रिपोर्टर नेपाल समाचार
काठमाडौं । संविधान दिवस मनाउन सरकारले यसवर्ष ३ दिनसम्म विभिन्न कार्यक्रमहरु गर्ने भएको छ । सरकारले असोज २, ३ र ४ गते गरी ३ दिनसम्म विभिन्न कार्यक्रमहरुको आयोजना गरी संविधान दिवस मनाउने भएको हो ।
आइतबार प्रधानमन्त्री तथा मन्त्रीपरिषद्को कार्यालय सिंहदरबारमा बसेको संविधान दिवस मूल समारोह समितिको बैठकले असोज २, ३ र ४ गते विभिन्न समारोहका साथ संविधान दिवस मनाउने कार्यक्रम तय गरेको हो ।
जसअनुसार असोज २ गते स्मारिक प्रकाशन, संवाद, परिसंवाद, अन्तरक्रिया कार्यक्रमहरु हुने र ३ गते सैनिकमञ्च टुँडिखेलमा विशेष समारोह गर्ने, देशभर तथा विदेशस्थित दूतावासहरु, कूटनीतिक नियोगमा समेत विभिन्न कार्यक्रमहरु गरिने तय गरिएको छ ।
बैठकले संविधान दिवसको अवसरमा तीन दिनसम्म साँझमा दीप प्रज्वलन गर्ने पनि निर्णय गरेको छ।