गोरखा । नेपालको तेस्रो राष्ट्रपति निर्वाचित भएपश्चात काठमाडौं बाहिरको पहिलो भ्रमणका लागि गोरखा पुगेका राष्ट्रपति रामचन्द्र पौडेलले आफ्नो भ्रमणलाई ‘सवारी’ शब्द प्रयोग नगर्न आग्रह गरेका छन्।

गणतन्त्र र राजतन्त्रको राष्ट्राध्यक्षबीच फरक हुने भन्दै राष्ट्रपति पौडेलले आफूले यस्ता विषय राष्ट्रपति चुनावकै बेलादेखि हेक्का राख्दै आएकाले आफ्नो भ्रमणलाई ‘सवारी’ शब्द प्रयोग नगर्न आग्रह गरेका हुन् ।

आइतबार गोरखा दरबारको अवलोकन र गोरखकालीमा पूजापाठपछि गोरखा संग्रहालय परिसरमा जिल्लाका सरोकारवालासँग भेट गर्दै उनले ‘सवारी’ शब्दको ठाउँमा ‘आवागमन’ शब्द प्रयोग गर्न सुझाव दिए ।

राष्ट्रियता र प्रजातन्त्रको संरक्षण र सम्वर्द्धन गर्ने आफ्नो प्रमुख जिम्मेवारी र कर्तव्य रहेको बताउँदै राष्ट्रपति पौडेलले भने,‘सवारी शब्दको रुढ मिनिङ हुन्छ, यसलाई सामन्तवादको प्रतीकको रुपमा लिइन्छ। त्यसैले अघिपछि गाडीको सन्दर्भमा प्रयोग गरे पनि भ्रमणको सन्दर्भमा सवारी शब्द प्रयोग नगरौँ।’