बंगलादेशका २१ मेडिकल कलेजमा नेपाली विद्यार्थीलाई भर्नामा रोक

प्रकाशित मिति: ११ मंसिर २०७४, सोमबार

काठमाडौं, ११ मंसिर । आज यहाँ पत्रकार सम्मेलन गरी नेपाल शैक्षिक परामर्श संघ(इक्यान)ले चिकित्सा शिक्षाका लागि बंगलादेशका सबै मेडिकल कलेजमा नेपाली विद्यार्थीको भर्नामा रोक नलगाइएको जनाएको छ । इक्यानका अध्यक्ष प्रकाश पाण्डेका अनुसार शिक्षा मन्त्रालय र नेपाल मेडिकल काउन्सिलले सम्बन्धित मुलुकको आधिकारिक निकायसँगको समन्वयमा २१ मेडिकल कलेजमा मात्र भर्नामा रोक लगाइएकाले अन्य कलेजमा नियमितरुपमा नेपाली विद्यार्थी जान सक्ने छन् ।

बंगलादेश सरकारले गुणस्तर र पूर्वाधारका विषयमा प्रश्न उठेपछि ती २१ कलेजमा भर्नामा रोक लगाएको हो । बंगलादेश जाने नेपाली विद्यार्थीको संख्या बढिरहेको समयमा सबै कलेजमा पढ्न नपाउने भन्ने प्रकारको भ्रममा नपर्न संघले आग्रह गरेको छ । इक्यानका उपाध्यक्ष विष्णुहरि पाण्डेकाअनुसार हरेक वर्ष करिब पाँच सय विद्यार्थी एमबिबिएस अध्ययनका लागि बंगलादेश जाने गर्छन् । संघका पूर्व अध्यक्ष राजेन्द्र बरालले हाल कालोसूचीमा रहेका केलज बन्दको अवस्थामा नरहे पनि अन्तर्राष्ट्रिय विद्यार्थीको भर्ना केही समयका लागि रोकिएको बताए ।

बंगलादेशमा हाल करिब दुई हजार पाँच सय नेपाली विद्यार्थी अध्ययनरत छन् भने नेपालका ३० शैक्षिक परामर्श केन्द्रले बंगलादेशका विश्वविद्यालयसँग काम गर्दै आएका छन् । बंगलादेशमा करिब एकसय ५० मेडिकल कलेज छन् ।


तपाईंको प्रतिकृयाहरू

 

 

 

 


ताजा अपडेट