रिपोर्टर नेपाल समाचार
काठमाडौं, १४ चैत । दिल्लीमा नेपाल र भारतबीच थप पाँच वर्षको लागि इन्धन आपूर्ति सम्झौताअनुसार भारतले आफ्नो नाफाको मार्जिन घटाएकाले अब तेल आपूर्ति लागत अहिलेकोभन्दा सस्तो पर्ने भएको छ ।
हिजो नै आयल निगमका कार्यकारी निर्देशक गोपालबहादुर खड्का, आपूर्तिमन्त्री दीपक बोहोरासहित आयल निगमका उच्च अधिकारीहरुको टोली उक्त सम्झौताका लागि भारत गएका थिए ।
आपूर्तिमन्त्री बोहोरा र भारतीय पेट्रोलियम तथा प्राकृतिक ग्यास मन्त्री धर्मेन्द्र प्रधानको उपस्थितिमा अब नेपालले तेस्रो मुलुकबाट तेल ल्याएको खण्डमा भारतले आपत्ति नजनाउँने र प्रशोधनसमेत गरिदिने गरी आयल काठमाडौंमा भारतीय आयल कर्पोरेशन र नेपाल आयल निगम (आईओसी) बीच सम्झौतामा हस्ताक्षर भएको छ ।
सम्झौताअनुसार नेपालले आफैँले पेट्रोलियम रिफाइनरी गर्न चाहेमा भारतले आफ्नो पूर्वाधार प्रयोग गर्न दिने विषय उल्लेख छ । नेपालभित्रै त्यस्तो रिफाइनरी सञ्चालन गरेमा तेस्रो मुलकुबाट कच्चा तेल ल्याउन आईओसीले आपत्ति नगर्ने गरी आयल निगमले सम्झौता गरेको छ ।
पाँच वर्षसम्म नेपालले मागे जति तेल दिने र नेपालमा रिफाइनरी खोल्न आइओसीसँगको सम्झौता बाधक नहुने गरी सम्झौता भएको हो ।