रिपोर्टर नेपाल
काठमाडौं, १४ माघ । माघ १ गते शनिबार बिहान लण्डनको साउथ ह्यारोस्थित घरको बाथरुममा झुण्डिएको अवस्थामा भेटिएका यमबुद्धको नामले चिनिने चर्चित र्याप गायक अनिल अधिकारीको शव शनिबार नेपाल ल्याइने भएको छ ।
लण्डनमा श्रीमतीसंगै बस्दै आएका २९ वर्षीय अधिकारीले गत माघ १ गते (जनवरी १४) आत्महत्या गरेका थिए । परिवारले शव नेपाल ल्याउने इच्छा राखेपछि उनको शव इत्तेहाद एयरबाट शनिबार दिउँसो ३ बजे काठमाडौं ल्याउन लागिएको हो ।
एक दशकअघि नेपाली र्याप संगीतमा पाइला चालेका अधिकारीको ‘मेरो जुत्तामा’, ‘साथी’, ‘आउँदै छु म’, ‘फुटपाथ मेरो घर’ लगायत एल्बम निस्किएको छ ।
पछिल्लो समय ‘खतरा’ नामक एल्बम ल्याउने तयारीमा रहेका उनी नेपाली हिपहप गायकका रुपमा निकै चर्चित थिए ।
त्रिभुवन विमानस्थलबाट उनको पार्थिव शरीर प्रज्ञा भवन कमलादीमा लगेर श्रद्धाञ्जलीका लागि केही समय राखिने र सोही दिन पशुपति आर्यघाटमा दाहसंस्कार गरिने पारिवारिक स्रोतले जनाएको छ ।