रिपोर्टर नेपाल समाचार
काठमाडौं, ६ माघ । चन्द्रागिरि हिल्स लिमिटेडले चन्द्रागिरिमा निर्माण गरिरहेको भौतिक संरचना र निर्माणका क्रममा गरेको वातावरणीय विनाशबारे संसद्को वातावरण संरक्षण समितिले स्थलगत अध्ययन गर्ने भएको छ ।
समिति अन्तर्गतको वनसम्बन्धी उपसमितिका संयोजक राजाराम स्याङ्तान र अन्य सदस्यले चन्द्रागिरिको स्थलगत निरीक्षण र अनुगमन गर्ने समितिले जनाएको छ । चन्द्रागिरिमा रहेका केबलकार, पाँचतारे रिसोर्ट, भ्यु टावर, मन्दिरलगायत संरचना बनाउँदा भएको वातावरणीय क्षतिबारे अध्ययनका साथै स्थलगत अध्ययनपछि सम्बन्धित पक्षलाई समितिमै बोलाएर छलफल पनि गरिने बताइएको छ ।
समितिले ऐन/कानुन विपरीत निर्माण भएको ठहरिए संरचना निर्माण बन्द गर्ने समेत जनाएको छ । वातावरणीय प्रभाव मूल्यांकन (ईआईए) प्रतिवेदनमा उल्लेख भएअनुसारका प्रतिबद्धता बेवास्ता गर्दै चन्द्रागिरि हिल्स कम्पनीले भौतिक संरचना निर्माण गरिरहेको छ ।
निर्माण गर्ने भौतिक संरचनाको नक्सासमेत पास नभएको र निर्माणका क्रममा अपनाउनुपर्ने वातावरणीय पक्षबारे ध्यान नदिएको बताइएको छ ।