इलाम, २१ असोज । जग्गा पास गर्दा लाग्ने राजस्वमा सरकारले छुट दिन थालेपछि इलाममा महिलाका नाममा जग्गा पास गर्नेको सङ्ख्या बर्सेनि बढ्न थालेको छ ।

आव २०७१÷७२ मा दुई हजार आठ महिलाले आफ्नो नाममा जग्गा पास गरेकामा आव २०७२÷७३ मा दुई हजार एकसय ४१ महिलाले पास गरेका छन् । ग्रामीण क्षेत्रका महिलालाई ३० प्रतिशत र नगर क्षेत्रकालाई २५ प्रतिशत छुट दिने व्यवस्था रहेपनि हाल आएर सबै क्षेत्रका महिलालाई २५ प्रतिशत छुट दिने व्यवस्था कायम भएको जिल्ला मालपोत कार्यालयले जनाएको छ ।

कार्यालयले आव २०७१÷७२ भन्दा आव २०७२÷७३ मा रु ६ लाख ९४ हजार ८२ बढी राजस्व छुट दिएको छ । महिलाले आफ्नो नाममा जग्गा पास गरी रु ४३ लाख ९१ हजार ४४ छुट पाएका कार्यालयका नायब सुब्बा कुलप्रसाद देवानले जानकारी दिए। आव २०७२÷७३ मा कार्यालयले रु चार करोड ७६ लाख २६ हजार राजस्व सङ्कलन गरेको बताइएको छ ।