बागलुङ, २१ असोज । बर्सेनि दसैँमा एक हजारभन्दा बढी भेडाच्याङ्ग्रा जिल्ला भित्रने गरेका छन् । दसैँ आगमनसँगै भेडाच्याङग्राको किनबेच बढेको छ । म्याग्दी भकिम्ली–६ का अम्मरबहादुर खत्रीले ९० वटा च्याङ्गा बागलुङ ल्याएकोमा आधाभन्दा बढी बिक्री भइसकेको बताउछन्। उनी लगायत चार जनाको समूहले चार दिन लगाएर मुस्ताङबाट भेडाच्याङ्ग्रा ल्याएर बिक्री गर्दैआएका छन् ।

बागलुङका स्थानीय व्यापारीसँग समन्वय गरी उनीहरूले भेडाच्याङ्ग्रा भित्र्याउने गरेका छन् । उनीहरूले मुस्ताङबाट प्रति च्याङ्ग्रा रु १९ हजार ५०० तथा प्रति भेडा रु १८ हजारमा खरिद गरेर ल्याएका हुन् । “रु २२ हजारदेखि रु २४ हजारसम्ममा भेडाच्याङ्ग्रा बिक्री भइरहेको ” म्याग्दी ज्यामरुककोटका सरोज सुवेदीले भने ।

अधिकांश ग्राहकको रोजाइ च्याङ्ग्रा रहने गरेको छ । बर्सेनि हजारौँको सङ्ख्यामा भेडाच्याङ्ग्रा मुस्ताङबाट अन्य जिल्लामा भित्र्याउने गरिएको छ । मुस्ताङ पुगेर भेडाच्याङ्ग्रा ल्याउनु कठिन काम भए पनि व्यापार राम्रो हुने देखेपछि यसो गर्दै आएको उनको भनाइ छ ।

भेडाच्याङ्ग्रा बाहेक ढोरपाटन क्षेत्रमा पाइने लेकाली भेडा र स्थानीय जातका खसी, बोकाको पनि बिक्री ह्वात्तै बढेको बताइएको छ ।
अहिले बजारका चोक–चोक र ग्रामीण भेगमा भेडाच्याङ्ग्रा व्यापारी पुगिरहेका छन् ।

पछिल्लो समय जिल्लामा विवाहको पहिलो वर्ष चेलिवेटीले माइतीकहाँ कोसेलीका रूपमा च्याङ्ग्रा लैजाने प्रचलन बढेको छ ।