रिपोर्टर नेपाल समाचार
रुपन्देही, १० असोेज । बुटवल उपमहानगरपालिकाको सहरी क्षेत्रमा आठ सय थान सौर्यबत्ती जोडिने भएका छन् ।
संघीय मामिला तथा स्थानीय विकास मन्त्रालय तथा जनसंख्या तथा वातावरण मन्त्रालयअन्तर्गतको वैकल्पिक ऊर्जा प्रबद्र्धन केन्द्रको अनुदान सहयोगमा सौर्यबत्ती जडान गरिएको हो ।

पहिलो चरणमा ५५, दोस्रो चरणमा ३०८ र तेस्रो चरणमा ४६८ सौर्यबत्ती जोडिने र यसका लागि करिब तीन करोड लगानी हुने उपमहानगरपालिकाका कार्यकारी अधिकृत ध्रुवबहादुर खड्का बताउँछन् ।

एक वर्षअघि वैकल्पिक ऊर्जा प्रबद्र्धन केन्द्रको अनुदानमा बुटवलका अमरपथलगायतका क्षेत्रमा ५५ वटा सौर्यबत्ती जडान भएका थिए । वैकल्पिक ऊर्जा प्रबद्र्धन केन्द्रले सौर्य बत्ती जडानका लागि ४० प्रतिशत अनुदान दिएकामा उपमहानगरपालिकाले र समुदायले ३०–३० प्रतिशत लगानी व्यहोरेका थिए । अनुदान आएका ३ सय ८ वटा सौर्यबत्ती यही असोज महिनाभित्रै जडान गरिने लक्ष्य छ ।

उपमहानगरपालिकाभित्र करिब साढे तीन करोड रुपैयाँको सौर्य बत्ती जडानमा खर्च गरिएको छ । बुटवल उपमहानगरपालिकाका सबै वडामा सौर्य बत्ती जडान गर्ने योजना भए पनि अहिले भने बजार केन्द्रित गरिएको छ । बजारका उपभोक्ता समितिबाट माग आएकाले प्राथमिकतामा बजारलाई राखिएको योजना अधिकृत डोलराज पौडेल बताउँछन् ।

बुटवल उपमहानगरपालिकाले तेस्रो चरणका लागि ४ सय ६८ थानमा सौर्यबत्तीे माग गरेको छ ।बत्ती जडानका लागि टेन्डर आह्वानपछि सम्झौता गर्नै कम्पनीले पाँच वर्षसम्म बत्तीको हेरचाह गर्ने पाँच वर्षपछि बत्तीको हेरचाह गर्ने जिम्मा समुदायमा आउने छ ।