रिपोर्टर नेपाल समाचार

काठमाडौँ, २८ पुस । पौष शुक्ल पूर्णिमादेखि माघ शुक्ल पूर्णिमासम्म हुने स्वस्थानी मेला साँखुस्थित शालीनदीमा आज बाट सुरु भएको छ ।आजदेखि हिन्दु महिलाहरुले स्वस्थानीको पूजा गरी स्वस्थानी व्रत लिने गर्छन् ।

हिन्दु धर्मावलम्बी महिलाहरुले आजबाट नङ काटी स्नान गरी शुद्ध वस्त्र लगाई व्रत बस्ने र राती महादेवको पुजा गर्ने गर्छन ।

एक महिनासम्म चल्ने यस मेलामा यस समयभित्र कुनै एक दिन मात्र भएपनि शालीनदीमा गई स्नान गरे पाप पखालिई पुण्य कमाइने धार्मिक विश्वास रहि आएको छ । साँखुको शालीनदी लगायतका स्थानमा व्रतालुहरुको घुइँचो लागेको छ ।

यो वर्षको एक महिने मेलामा १७ उपसमिति गठन गरी यातायात, शान्ति सुरक्षा, लाइन एवम् बजार व्यवस्थापन, प्रसाद वितरण, स्वयम्सेवक परिचालन आदिका लागि सबै तयारी पूरा गरेको समितिका संयोजक राजुभाइ मानन्धरले बताए ।

विगत केही वर्षदेखि शालीनदीमा आउने पर्यटकको सङ्ख्या वृद्धि हुँदै गएको छ, भारतका विभिन्न स्थानबाट समेत धार्मिक पर्यटक शालीनदीमा आउने क्रम बढ्न थालेकाले मेलालाई अझ व्यवस्थित बनाएको छ । शालीनदीको यो मेला माघ २८ गतेसम्म लाग्नेछ ।

तस्वीर:रुपचन्द्र महर्जन