काठमाडौं। सोमबार देशभरका विभिन्न जिल्लाका थप ७२ जनामा कोरोना संक्रमण पुष्टि भएको छ।

मन्त्रालयका सहप्रवक्ता डा. समिरकुमार अधिकारीका अनुसार रौतहटमा २६, बारामा २३, दैलेखमा ७, बाँकेमा ४, काठमाडौं, धनुषा र कपिलवस्तुमा ३/३ जना, सप्तरीमा २ र बर्दियामा १ जना गरी ७२ जना नेपालीमा कोरोना संक्रमण पुष्टि भएको हो ।

काठमाडौंको टोखा नगरपालिका-३ र ६ तथा बूढानीलकण्ठ नगरपालिका-३ का २७ वर्षीय पुरुष र ४१ वर्षीय पुरुषमा संक्रमण पुष्टि भएको हो । टोखा नगरपालिकामा भेटिएका कोरोना संक्रमित किराना पसले भएको पाइएको छ ।

नगरपालिकाले तरकारी, औषधि, किराना पसल सञ्चालन गर्ने तथा जनप्रतिनिधि गरेर ३०६ जनाको थ्रोट स्वाब संकलन गरेर परीक्षणका लागि पठाएकोमा दुई जनाको रिपोर्ट पोजेटिभ आएको बताइएको छ । आज थपिएकाहरुसँगै नेपालमा कोराना संक्रमितहरुको संख्या ६ सय ७५ पुगेको मन्त्रालयले जनाएको छ ।