काठमाडौं । अभिनेत्री खुश्बु खड्काले देशमा सक्षम नागरिक उत्पादनका लागि मन्टेश्वरी शिक्षाको भूमिका महत्वपूर्ण हुने बताएकी छन् । काठमाडौं महानगरपालिका वडा नंं २ लाजिम्पाट अवस्थित ‘मिनी किड्स मन्टेश्वरी’ उद्घाटन गर्दै अभिनेत्री खड्काले सो कुरा बताएकी हुन् ।

‘मन्टेश्वरीमा बालबालिकाको रुचि र चाहना अनुसारको शिक्षा हुने भएकाले अबको दिनमा यो अनिवार्य छ’ अभिनेत्री खड्काले भनिन् ‘यसमा उनीहरुले खेल्दा खेल्दै धेरै कुरा सिक्न सक्छन् ।’ घर बलियो बनाउन जसरी त्यसको जग बलियो आवश्यक छ । त्यस्तै सक्षम मानिस उत्पादनका लागि मन्टेश्वरी शिक्षा भएको खड्काको भनाई रहेको थियो ।

सरस्वती पूजाको अवसर पारेर आज आइतबारबाट संचालनमा आएको ‘मिनी किड्स मन्टेश्वरीमा’ रश्मी गुरुङले संचालनमा ल्याएकी हुन् । जसको उद्घाटन अभिनेत्री खुश्बुसँगै, काठमाडौं महानगरपालिका वडा नंं २ का अध्यक्ष राजेन्द्र कुमार श्रेष्ठ, समाजसेवी हिराकाजी श्रेष्ठ, एमपी भुषाल, बिक्रम बिष्ट लगायतले रिवन काटेर गरेका थिए ।

कार्यक्रममा वडा अध्यक्ष श्रेष्ठले बालबालिकाको विकासका लागि मन्टेश्वेरीले खेल्ने भूमिकाको चर्चा गरे । उनले मन्टेश्वेरीको शिक्षा र त्यसको वातावरणले बालबालिकाको भविष्य कता जान्छ भनेर अनुमान गर्न सकिने बताए ।

व्यक्तिगत, पारिवारिक र संस्थागत रुपमा शिक्षा मात्र नभई संरक्षण, पोषण र स्याहार सुसारको वातावरणमा शिक्षा दिनुपर्छ भन्ने उद्देश्यका साथ आफूले मन्टेश्वरी संचालनमा ल्याएको मन्टेश्वरीका संचालक रुश्मी गुरुङले बताइन् । शिक्षण विधि मन्टेश्वरी विधिबाट अध्यापन गराउने भएकोले मन्टेश्वरीले बालबालिकाको जीवनमा सकारात्मक परिवर्तन गर्ने गुरुङको भनाई रहेको थियो ।

अभिभावकहरु व्यस्त हुँदा बालबालिकाहरुको उपयुक्त हेरचाह गर्ने स्थानको रुपमा फस्टाउँदै गएको मन्टेश्वरी अहिले धेरै अभिभावकहरुको रोजाईको ठाउँ बनेको धेरै कार्यक्रममा बोल्ने धेरै वक्ताहरुको भनाई रहेको थियो । उद्घाटन कार्यक्रममा विभिन्न गीत संगीतका साथै आकर्षक नृत्यहरु समेत रहेका थिए ।