दाइजो र बोक्सी कुप्रथा अन्त्य गर्न मधेशवादी दललाई कुनै चिन्ता छैन : अध्यक्ष ओली

प्रकाशित मिति: ४ मंसिर २०७४, सोमबार

मोरंग, ४ मंसिर । विराटनगरमा आज आयोजित चुनावी सभालाई सम्बोधन गर्दै एमालेका अध्यक्ष एवं पूर्व प्रधानमन्त्री केपी शर्मा ओलीले आफू प्रम भएको समयमा मधेशको विकासका लागि गरिब जनताको आवासका लागि २० हजार घर निर्माण, हुलाकी राजमार्ग, चक्रपथ निर्माण र आधुनिक कृषि उत्पादनमा वृद्धिलगायतका कार्यक्रममा बजेट बिनियोजन गरिएको जानकारी दिएका छन् । कार्यक्रममा उनले केही राजनीतिक दलका कारणले मधेशमा शिक्षा, स्वास्थ्य क्षेत्रमा पिछडिएको चर्चा गर्दै दाइजो र बोक्सी कुप्रथा अन्त्य गर्न मधेशवादी दललाई कुनै चिन्ता नभएको आरोप समेत लगाए ।

आफ्नो पार्टी तराई/मधेश विरोधी पार्टी नभएको स्पष्ट पार्दै अध्यक्ष ओलीले पूर्वाञ्चल विश्वविद्यालयको मेडिकल कलेज मोरङको गाउँगाउँमा संचालनमा आउने, काँकडभिट्टादेखि सुनसरीको कोशी पुलसम्मको छ लेनको सडक विस्तार, जोगबनी–कटहरी रेलमार्गको निर्माण, विराटनगरको विमानस्थलको विस्तार र विराटनगरको चक्रपथ कालोपत्रे हुने जनाएका छन् । सो अवसरमा उनले विभिन्न पार्टी परित्याग गरी एमालेमा प्रवेश गर्नेलाई स्वागत समेत गरेका थिए ।

माओवादी केन्द्र, मोरङका अध्यक्ष गोपी अछामीको सभापतित्वमा सम्पन्न भएको सो सभामा मोरङ क्षेत्र नं.४ का माओवादी केन्द्रका प्रतिनिधिसभा उम्मेदवार अमनलाल मोदी र क्षेत्र नं.४ प्रदेश (२) का नेकपा एमालेका उम्मेदवार जीवन घिमिरेले अब बन्ने वाम गठबगन्धन सरकारले विराटनगरलाई प्रदेश नं.१ को राजधानी बनाउने आश्वासन दिएका छन् ।


तपाईंको प्रतिकृयाहरू

 

 

 

 


ताजा अपडेट